Articles

Mesazhi Pershendetes i Dekanit te Fakultetit te Mjekesise

Dekani-fakultetit-mjekesise-BAJRAMII nderuar zoti rektor i Universitetit të Tiranës, Prof.Dhori Kule!
E nderuara doktoreshë Mirela Tabaku, Keshilltare e Kryeministrit të Shqipërisë!
Të nderuar kolegë dekanë të fakulteteve të tjera, të nderuar ish-dekanë që keni drejtuar në vite Fakultetin e Mjekësisë!
Të nderuar profesorë, staf administrativ, studentë e specializantë!
Të nderuar të ftuar!

Dëshiroj në rradhë të parë të shpreh falenderimin dhe mirënjohjen më të thellë për të gjithë ata që më dhanë besimin e tyre në drejtimin e Fakultetit të Mjekësisë për katër vitet në vijim. Ju jam mirënjohës për mbështetjen tuaj të shprehur me pjesëmarrjen masive në takimet e zhvilluara kudo në fakultet dhe në votime, për vëmendjen që i kushtuat programit dhe platformës që paraqita përpara jush, dhe ju falenderoj për mendimet dhe idetë që munda të marr prej jush.

Jam shumë krenar se këto zgjedhje treguan edhe një herë nivelin e lartë qytetar,shoqëror dhe civil të Fakultetit të Mjekësisë duke formuar një model social të mjaftueshëm që vuri në themel procesin transparent e gjithë përfshirës. Një falenderim të vecantë për kolegët të cilët më shumë se konkurent i kam konsideruar si bashkëgarues, të cilëve u konfirmoj vlerësimin dhe kontributin thelbësor për nivelin e garës dhe vlerat që manifestuan. Në fund të këtij procesi fitues është Fakulteti i Mjekësisë dhe vlerat e tij akademike të themeluara dhe zhvilluara nga shumë breza pedagogësh dhe studentësh.

Këtë muaj komunikimi të drejtpërdrejtë me stafin akademik të Fakultetit të Mjekësisë ,me studentët, mjekët, specializantët, personelin administrativ dhe mbështetës, në dhjetra e qindra takime të drejtpërdrejta ku treguan qartë një të vërtetë të madhe : nevojen e ndryshimit të përfshirjes së Fakultetit të Mjekësisë dhe lëvizjen e madhe të gjithë shoqërisë shqiptare drejt zhvillimit dhe Europës.

Në epokën e internetit ne nuk mund t’i lejojme më vetes skema të vjetëruara apo metoda didaktike tashmë gjysmë shekullore. Koha kërkon një hap cilësor drejt niveleve akademike botërore dhe akreditimit bashkëkohor. Në të gjithë zërat që kam dëgjuar fjala kyç ka qënë ndryshimi i mësimdhënies, kurrikulës, performancës dimensive. Mendoj që është momenti dhe koha për një ndryshim shumë dimensional që do të bëhet si në mësimdhënie, si në kërkimin shkencor, si në praktikën klinike, si në lirinë akademike, në autonominë financiare dhe menaxhimin e resurseve njerëzore dhe materiale dhe për këtë une kam besimin se me ju profesorë të nderuar që jeni elita jo vetëm e Universitetit të Tiranës por edhe e kombit tone, sëbashku do të realizojmë këtë ndryshim.

Është koha e energjive të reja në sfidat që do të përballojmë dhe në fokusin e punës tonë do të jenë studentët dhe mësimdhënia, por edhe infrastruktura dhe kërkimi shkencor, në fokus të të gjithave mbështetjeve të Universitetit të Tiranes , edhe të bashkëpunimit me qeverinë shqiptare por edhe me sponsorizuesit kryesor që do t’i japin vitalitetin dhe shtysën e nevojshme fakultetit tonë të shek. XXI, duke e kthyer atë në një lokomotivë të trenit të reformimit, të modernizimit të mjekësisë dhe të sistemit tonë shëndetësor bashkëkohor ,që për hir të së vërtetës po përjeton ndryshime të shpejta radikale dhe shoqërore me kryefjalë cilesinë, për t’a shndërruar Fakultetin e Mjekësisë në një institucion të akredituar sipas standarteve europiane të arsimit të lartë ku në qendër të vëmendjes do të jenë studenti në rrugën e formimit si mjek i aftë, si në aspektin teorik ashtu edhe në praktikë.

Për këtë qëllim do të shfrytëzojmë të gjitha resurset nga ana e profesoratit tonë deri tek telemedicina që është një risi që ne do t’a fusim në këto katër vite në vazhdim, por edhe me anë të studimeve online.

Do t’a konsideroj gjithmonë veten të parët mes të barabartëve , duke patur si moto të punës time: që të udhëheq dhe jo të komandoj, që të drejtoj e jo të sundoj, duke i dhënë më shumë përgjegjësi vetes sesa liri,por mbi të gjitha duke krijuar një ambjent të ngrohtë në këtë institucion që nga studentët , punonjësit administrativ dhe deri tek profesorët tanë të nderuar për të siguruar që cdo ditë e punës sime do t’i përkushtohet Fakultetit të Mjekësisë. Ndryshimi do të ndodhë dhe atë do t’a bëjmë së bashku .

Ju faleminderit!

Prof.Dr.Bajram HYSA